Шымкент экономикасына 6 триллион теңге инвестиция тартылады
Шымкент қаласының экономикасына алдағы 5 жылда 6 триллион теңге инвестиция тарту көзделіп отыр. Бұл бағытта нақты жоспар да жасалған.
Бұл туралы ҚР Президентінің жанындағы Орталық коммуникациялар қызметінде өткен баспасөз брифингінде Шымкент қаласының әкімі Ғабит Сыздықбеков мәлімдеді.
Ғ.Сыздықбеков Шымкент қаласы экономикасының инвестициялық тартымдылығы жылдан жылға артып келе жатқанын атап өтті. Оның айтуынша, соңғы 4 жылда 1,5 трлн теңге инвестиция тартылған. Ал, алдағы 5 жылда 6 триллион теңге инвестиция тарту көзделіп отыр. Бұл бағытта нақты жоспар да жасалған.
–Қазірдің өзінде жалпы сомасы 1,7 трлн теңгені құрайтын 229 инвестициялық жобаның пулы жасақталды. Оның ішінде, басым бағыттары өңдеу өнеркәсібі саласында – 405,8 млрд теңге, тұрғын үйге – 594,4 млрд теңге, денсаулық сақтауға – 128 млрд теңге, ауыл шаруашылығына – 363,9 млрд теңге жоспарланып отыр. Нәтижесінде, 34 мыңнан аса жаңа жұмыс орны ашылатын болады, – деді қала әкімі.
