Шымкент қаласының Орталық саябағында ардагерлер мен қарияларға арналған “Шахматшылар үйі” ашылды. Жаңа нысанның ашылу рәсіміне қала әкімі Ғабит Сыздықбеков, қала тұрғындары, ардагерлер мен қариялар және БАҚ өкілдері қатысты.
Жаңа нысанда бір уақытта 40 адам шахмат ойнай алатын 20 шахмат үстелі бар. Ғимарат толық жылу жүйесімен және электр желісімен қамтамасыз етіліп, орталықтандырылған кәріз жүйесіне қосылған. Жаңа ғимарат демеушілер есебінен, бір айдан астам уақытта салынды.
Орталық саябақта ардагерлер қысы-жазы шахмат ойнайтыны көпшілікке мәлім. Енді зияткер ойынның өкілдеріне арнайы ғимарат ашылып отыр.
Бұған дейін тұрғындар бірнеше рет қала әкімінің қабылдауы мен көшпелі кездесулерінде шахматқа арналған арнайы орын салып беру туралы өтініш айтқан болатын. Халықтың пікірін ескерген мегаполис басшысы қалалық жайлы ортаны дамыту басқармасына нақты тапсырма берді.
Іс-шарада ардагерлер қала әкіміне алғыстарын жеткізді. Шаһар басшысы ардагерлерге жаңа ғимаратты игілікке пайдалануға шақырды.