Дәстүрлі турнирде 240 балуан бақ сынауда
![](https://mediaon.kz/wp-content/uploads/2024/01/395887164_3482475125398762_4048018284907744975_n-1024x682.jpg)
Шымкент қаласында «Жеңіл атлетикалық манеж» спорт кешенінде академик Мардан Баймырзаұлы Сапарбаевты еске алуға арналған грек-рим күресінен республикалық турнир басталды. Биыл 29-шы рет ұйымдастырылған жарыста еліміздің барлық өңірінен және Қырғызстан, Өзбекстан республикаларынан, жалпы 240 спортшы бақ сынап жатыр.
Сайыстың ашылу рәсімінде Шымкент қаласы әкімінің бірінші орынбасары Қуаныш Асылов шаһарда грек-рим күресі қарқынды дамып жатқанын, спортшыларға жағдай жасауда жүйелі жұмыстар қолға алынғанын атап өтті.
-Академик Мардан Баймырзаұлы еліміздің өркендеуіне, спорттың дамуына айрықша үлес қосқан тұлға. Қаншама спорт саңлақтары мен шәкірттер даярлап, өшпес із қалдырды. Дәстүрлі сайыстың жылдан-жылға ауқымы кеңейіп келеді. Шымкент қаласының балуандары да биыл Азия ойындарында жүлделі орындарды иеленді. Шаһарда спортты қолдаудағы жүйелі жұмыстар одан әрі жалғасын табады, — деді қала әкімінің бірінші орынбасары.
Педагогика ғылымдарының докторы, профессор Оңалбай Аяшев, ҚР грек-рим, еркін және әйелдер күресі федерациясының вице-президенті Думан Зекенов турнирдің тарихына тоқталып, балуандарға сәттілік тіледі.
Шаһарда грек-рим күресі қарқынды дамып келеді. Биыл Шымкент қаласының балуандары Мейіржан Шермаханбет пен Әлімхан Сыздықов Азия ойындарында жүлдегер атанған болатын.
Дәстүрлі жарыс ертең мәресіне жетеді.