Шымкент: «Пиротехника» жедел-профилактикалық іс-шарасы өтуде

Шымкент қаласының Полиция департаменті мен Төтенше жағдайлар департаменті Жаңа жыл мерекесі қарсаңында өрт қауіпсіздігін сақтау мен пиротехникалық бұйымдарды қолдануда қауіпсіздік шараларын сақтау бойынша БАҚ өкілдеріне баспасөз конференциясын берді.

Ақпараттық-коммуникациялық орталығының баспасөз алаңында Әкімшілік полиция басқармасының бастығы, полиция полковнигі Ерғали Сүлейменов, ҚР Ішкі істер министрлігінен келіп түскен нұсқауға сәйкес, ағымдағы жылғы 25 желтоқсан мен 2024 жылдың 3 қаңтар күндері аралығында «Пиротехника» жедел-профилактикалық іс-шарасы өткізіліп жатқандығын айтты.

«Іс-шара барысында сәйкестілік сертификаты жоқ пиротехникалық бұйымдарды жаппай сату, сондай-ақ рұқсат құжаттарысыз сатылатын фактілерді анықтау және оның жолын кесуге бағытталған рейдтік іс-шаралар ұйымдастырылатын болады.

Азаматтық пиротехникалық заттар мен олар қолданылып жасалған бұйымдарды сатып алу, сақтау, есепке алу, пайдалану, тасымалдау, жою, әкелу, әкету Қазақстан Республикасы Ішкі істер министрінің 2015 жылғы 8 сәуірдегі № 319 бұйрығымен бекітілген қағидаға қатаң сәйкестікте жүзеге асырылуы тиіс»,- деді спикер.

Баспасөз конференциясының толық нұсқасын https://www.youtube.com/@AKO17/streams   сілтемесіне өту арқылы көре аласыздар.