Қоғамдық кеңес мүшелері сыбайлас жемқорлықтың алдын алу мәселелерін талқылады
![](https://mediaon.kz/wp-content/uploads/2024/02/403755606_3498418603804414_1376347598788280516_n-1024x682.jpg)
Бүгін Шымкент қаласындағы М.Әуезов атындағы Оңтүстік Қазақстан университетінде Қазақстан Республикасы Сыбайлас жемқорлыққа қарсы іс-қимыл Агенттігінің жанындағы Қоғамдық кеңес мүшелерінің Шымкент қаласы Қоғамдық кеңесінің мүшелерімен кездесуі өтті.
Сыбайлас жемқорлықтың алдын алу және оған қарсы ақпараттық-насихаттық жұмысты жүргізу бойынша өзара тәжірибе алмасу мақсатында өткен жиында бірқатар өзекті мәселелер талқыланды.
Кездесуде Сыбайлас жемқорлыққа қарсы іс-қимыл Агенттігінің жанындағы Қоғамдық кеңестің төрағасы — ҚР Парламенті Мәжілісінің депутаты Марат Башимов қоғамда жемқорлыққа қарсы сананы қалыптастырудың маңызы туралы әңгімеледі.
— Биыл елімізде «Қоғамдық бақылау туралы» заң қабылданды. Бұл Қоғамдық кеңестер қызметінің маңызын арттыра түсті. Біз қолда бар мүмкіндіктерді пайдалана отырып қоғамда жемқорлыққа қарсы сананы қалыптастыруға үлес қосуымыз керек, — деді ол.
Сондай-ақ, кездесу барысында Шымкент қаласы Қоғамдық кеңесінің төрағасы Бауыржан Әлтеев те сөз алып, кеңестің сыбайлас жемқорлыққа қарсы іс-қимыл бағытында атқарып жатқан жұмыстарын баяндады.
Мұнан кейін Сыбайлас жемқорлыққа қарсы іс-қимыл Агенттігінің жанындағы Қоғамдық кеңесінің мүшелері Шымкент қаласындағы еріктілермен де кездесу өткізіп, күн тәртібіндегі мәселелер бойынша жастармен еркін форматта пікір алмасып, олардың сауалдарына жауап берді.