9 айда 17 мыңнан астам азамат жұмыспен қамтылды
Шымкент қаласы жұмыспен қамту және әлеуметтік қорғау басқармасының басшысы Балмаржан Нарбекова 2023 жылдың 9 айының қорытындысы бойынша атқарылған жұмыстарды қорытындылап, баспасөз брифингін өткізді. Басқарма басшысы жұмыспен қамту шаралары, ардагерлер мен аз қамтамасыз етілген азаматтарды әлеуметтік қорғау, мемлекеттік атаулы әлеуметтік көмек беру, мүгедектігі бар азаматтарды әлеуметтік қорғау және арнаулы әлеуметтік қызметтердің орындалу барысын баяндады.
Шымкентте биыл 57 181 адамды жұмыспен қамту шараларына қатыстыру жоспарланып, оған 9 айда 56 379 адам қатысқан. Жылдық жоспар 99 пайызға орындалып отыр. «2021-2025 жылдарға арналған кәсіпкерлікті дамыту» ұлттық жобасы аясында 17 мыңнан астам азамат жұмыспен қамтылды. Оның ішінде, 9156 адам тұрақты жұмыс орнына орналасып, 8 мыңға жуығы субсидияланатын жұмыс орындарына жолданған.
-Жыл басынан бері 22 870 жаңа жұмыс орны құрылды. Оның ішінде, 21 815 орын кәсіпкерлік жеке бастамамен және 1055-і ұлттық жобалар аясында ашылып отыр. Қазіргі таңда 2431 жұмыссыз азамат тегін 3 айлық қысқа мерзімді кәсіптік оқытудан өтуде. Оқу сәтті аяқталған соң оларға сертификат табысталып, әлеуметтік келісім-шарт негізінде кемінде 12 ай мерзімге тұрақты жұмыс орындарына орналасады. Сондай-ақ жыл басынан бері https://skills.enbek.kz/ онлайн платформасында 2 жарым мыңнан астам адам кәсіптік білім алған, — деді басқарма басшысы.
Биыл жасы 21 мен 35 жас аралығындағы 261 азаматқа жеңілдетілген 2,5% шағын несие беру жоспарланып, бүгінгі күнге жалпы 379 үміткер бизнес жобасын таныстырған. Нәтижесінде, 209 үміткер комиссия қорытындысымен оң шешім алған. 145-не шағын несие беріліп, басым көпшілігі өз кәсіптерін бастап кетті.
